Spreuke 15:29

LEES
Die Here is ver van die goddeloses af, maar Hy hoor die gebed van die regverdiges.

DINK
Ons deel hierdie week oor ons getuienis as kind van God.  Ons getuienis is nie eintlik die manier hoe ons ongelowiges vertel van ons bekering nie.  Ons getuienis is veral ons lewe.  Die eerste belangrike saak is dus om te LEEF as kind van God.  Dan moet ons ook kan bid.  Ons glo aan die krag van gebed.  Navorsing het al bevind dat daar veranderinge plaasvind by diegene vir wie gebid word (teenoor 'n kontrolegroep), sonder dat enige-een geweet het dat daar vir hulle gebid word.  Ek en jy moet dus ook vir ons ongelowige vriende bid.  Ons moet bid vir hulle welsyn en dat die Here hulle sal seën en bewaar.  Dan moet ons bid dat ons lewe so sal wees dat hulle Christus in ons sal sien. Ons moet verder bid dat daar 'n behoefte by hulle sal ontstaan vir God en 'n rypheid om Hom te aanvaar.  Dan bid ons dat daar geleenthede sal ontwikkel dat ons oor ons geloof sal kan praat, en dat ons sinvol en koherent ons volgelingskap van Jesus sal kan verduidelik.  Ons bid dat ons woorde ingang sal vind, en dat daar 'n hart sal wees wat reageer.  Bid, vriend!

BID
Here, ek wil vandag bid vir my ongelowige vriend, nl. .... Amen.

DOEN
Kom in die gewoonte om met God in gesprek te wees oor almal met wie jy deel.

© 2010 PADLANGS DEUR DIE LEWE.  Alle regte voorbehou.