‘n Splinternuwe Gospel radiostasie met jongmense tussen 13 en 25 jaar oud as teikengehoor - Seven Teen FM - het gister aand landswyd afgeskop.  Uitsendings sal gehoor kan word op die frekwensies wat tans die programme van Kanaal Sewe dra. Programme begin om tienuur saans waarna Seven Teen FM  Sondae- tot Donderdagaande tot middernag gehoor kan word, Vrydagaande van tien- tot tweeuur Saterdagoggende en Saterdagaande van tienuur af tot om eenuur Sondagoggende.    Volgens die Programbestuurder van Kanaal Sewe Media vir Christus, Andre Henning, sê verskillende temas waarby die jeug van Namibië aanklank sal vind, sal saans met kundiges hanteer word, met geleentheid vir Christen-tieners om hulle mening te lug en insette te lewer.  Slegs Gospel musiek word gespeel met die klem op treffers en nuwe vrystellings vir die Christen jeug mark.  
 
Die omroepers wat die stasie sal beman is Elmarie en Nic Maandae tot Donderdagaande en Luton en Toiny oor naweke.  Die naweek uitsaaibeurte sal egter afgewissel word.  Jongmense is welkom om hul mening en voorstelle met die omroepers te deel by die SMS-lyn 1023.  E-pos adresse sal tydens die eerste uitsending bekend gemaak word.  Benewens inligting op die sosiale netwerk FACEBOOK  oor die nuwe radiostasie, sal meer besonderhede ook by skole  beskikbaar gestel word.

Genesis 1:26

LEES
Toe het God gesê: "Kom Ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip."

DINK
In die bg. vers lees ons hoe God besluit om die mens te maak.  Die eerste wat Hy oor die mens sê is dat hy God se beeld sal wees, en tweedens dat hy sal heers.  Ons is gemaak om te heers, vriend!  Soos die eerste mens moet ons ook in ons eie wêreld heerskappy uitoefen.  Hoekom gebeur dit dan dat ons lewens in sulke chaos is?  Wel, omdat ons nie beheer neem nie - omdat ons ons opdrag versaak!   Daarom voel ons ook asof alles handuit ruk, en chaos wil oorneem.  Neem beheer, vriend!  Ons gaan hierdie week hieroor deel, en ons begin by ons dag.  Kom ons stel dit so: as ons nie beheer van ons dag gaan neem nie, gaan ons dag beheer van ons neem!  Ons het meer ritmes en reëlmaat nodig, roetines en dissiplines.  Sekere dinge moet op 'n sekere tyd gebeur. Selfs al het jy die deurmekaarste en onvoorspelbaarste program, moet daar method in your madness wees.  Ritme maak jou gees rustig en stel jou in staat om effektief te wees.  Beweeg na meer ritme, vriend:  vir jou opstaan, jou werk toe gaan, vir God (ja, asseblief), vir etenstyd, huis toe, jou etes, jou aandritueel, jou naweke.  Voeg meer intensioneel waarde toe.

BID
Here,  ek stel U in beheer van my lewe; help my om my chaos uit te sorteer.  Amen.

DOEN
Kry jou dag in orde, maar maak ook seker dat daar tyd is vir God (tien minute stilword daagliks is baie werd as jy besig is), en ook vir 'n klein ontspantydjie vir jouself.  Sorg dat jy genoeg slaap kry - baie belangrik!

© 2010 PADLANGS DEUR DIE LEWE.  Alle regte voorbehou.