NUUS

Die Withuis in Amerika sê die president, Donald Trump gaan na verwagting ‘n nasionale ramp verklaar om sy beplande muur op die grens met Mexiko te befonds. Volgens die Withuis sal hy ‘n wet oor grensveiligheid onderteken om te keer dat die regering weer tot stilstand kom, maar dat hy beplan om kongres te omseil en militêre fondse te gebruik om die muur te befonds. Die Kongres het gister die wetgewing goedgekeur, maar dit voldoen nie aan Trump se eise vir befondsing om die muur te bou nie. Die speaker in die Huis van Verteenwoordigers, Nancy Pelosi het reeds aangedui dat die Demokratiese Party hof toe sal gaan indien die president ‘n ramp afkondig. Sy en die party se leier in die senaat, Chuck Shumer het die stap as wetteloos en ‘n erge magsmisbruik bestempel.

 

Die voorsitter van die Namibiese Lughawensmaatskappy, die NAC – Leake Hangala – sê ‘n hoof-uitvoerende beampte vir die organisasie is nog nie aangestel nie en daar word voortgegaan om ‘n geskikte kandidaat te soek. Hy het gereageer op ‘n berig in ‘n Engelse koerant dat die raad ingestem het om die bestuurshoof van die Namibiese Hawe-owerheid – Bisey /Uirab – aan te stel, wie se termyn by Namport in April ten einde loop. Hangala het aan Nampa gesê dat ‘n aanstelling hopelik teen die einde van die maand gefinaliseer sal kan word.

 

Een van die Gupta-broers, Ajay, is nie meer ʼn voortvlugtige voor die gereg in Suid-Afrika nie, nadat die Nasionale Vervolgingsgesag die lasbrief vir sy inhegtenisneming gekanselleer het. Die Valke sê dit was ʼn onafwendbare regsgevolg van die voorlopige terugtrekking, verlede maand, van die aanklagte teen Duduzane Zuma. Gupta is gesoek in verband met korrupsie. News24 berig dat Gupta ʼn jaar gelede amptelik as voortvlugtige voor die gereg verklaar is. Die Valke sê die staatskapingsondersoek duur voort.

 

En ten slotte: Suid-Afrika se Departement van Sport en Ontspanning sal vandag die Regering se bystandsplan uitstippel vir die Olimpiese gouemedaljewenner, Caster Semenya. Die Arbitrasiehof sal volgende week haar saak aanhoor oor die IAAF se verwagte reël wat haar en ander vroulike atlete met hoë testosteroonvlakke sal dwing om dit te verlaag voordat hulle aan internasionale wedlope kan deelneem. Die woordvoerder van die departement, Vuyo Mhaga, sê die regulasies maak geen sin nie en is onregverdig.

 

Kanaal Sewe Nuus. Namibië en die Wêreld op hierdie oomblik.